Mega Match between C.Ronaldo and Messi bin almost happen

 E remain small like dis make match between Team Ronaldo and Team Messi happen. Di match for give dem opportunity to choose dia own players and dem go play against each oda.

Na one London based dealer bin propose dis €90 million game. Di project no finally happen because plenty parties bin want one tin or di oda plus join di plenty wahala of football politics.

History go remember Christiano Ronaldo and Messi as two of di best football players for dis life.

Di two of dem dominate football for Europe for almost 20 years wia dem break different individual record in di last 10years.

Di two of dem don pass dia shine shine age and dis world cup wey dey happen for Qatar dis year fit bi dia last World Cup. 

According as how di sun gist di gist, e remain small make two of dem play match against each oda for Wembley stadium wia dem go fit choose dia own team players dem.

One book wey dem title Messi vs Ronaldo reveal di American style all star game wit Messi and Ronaldo as captain of dia own team.

As di book yarn, London based strategist, Robert Bonnier, wey bi former multimillionaire approach di camp of di two players about di project for 2014. Even though two of dem dey play against each oda for La-liga steady dat year, Bonnier want match between dem wey go dey happen two times a year, wia dem go fit pick dia own players.

Dem bin plan di first match to happen for 2017. Di organizers dem bin plan di event like festival, live band and even boxing match go dey. To get support for dis kain tin from bodies like FIFA and UEFA no bi moi moi.

Di presido of Real Madrid, Florentino Perez say im go collect £21 million if any of im Real Madrid players go dey involve.

Di dream no finally happen as too many pipo want one tin or di oda from di mata plus join plenty politics wahala for football mata.

Since Messi and Ronaldo don comot for La-liga, di El-Classico no dey tough like before again.