Pidgin Sports

 We dey use dis opportunity thank all of una wey don dey support us since we start till today. Dis new year go pay all of us and beta tins go shelle for us for dis new year. God go run am for us.

 Ronaldo don sign two year contract with AlNassr club for Saudi Arabia. Dis one come afta C.Ronaldo comot for Man U afta di interview wey him do wit Piers Morgan unto say im no like how Dem dey do am for Man U and say him no respect Ten Hag wey bi Man I manager again. Ronaldo don bi free agent since den and Saudi Arabia club, AlNassr see big opportunity to sign di superstar and Ronaldo sef no dull am as no oda club go like dey interested for him mata. Di club announce di mata untop Twitter for Midnight as many pipo don dey drop Wetin dem tink about di mata. But anyhow you see am, Ronaldo don dey near 40 years and dis move make sense for am unto say di money heavy.

 Darwin Nunez don yarn say him prefer Mohammed Sallah pass Messi or Ronaldo wey everybody dey shout upandan. Di argument of say who bi GOAT between Messi and Ronaldo don dey go on now as di two of dem don dominate football for over 10 years plus now. Salah dey part of di best players for English Premier League as we dey yarn so and naim bi di African man wey don score pass for Premier League history. Nunez don add him own join di argument as him support him Liverpool team member say na dat one him sabi as GOAT. For inside di video wey dey trend online, Dem ask am say, Messi or Ronaldo, Nunez smile small, look di interviewer, rely say 'Salah'

 Neymar wey collect golden boot for di 2022 world cup wey jus finish for Qatar don yarn say him want make di club sell Neymar as part of di condition wey di club must fulfill before him go fit decide say him wan stay wit dem. Mbappe and Neymar get kwanta wey con make Mbappe tell di club say him no fit stay for di club if Neymar still dey dia. Mbappe still get 2 years for him contract after di guy agree to extend him contract wit di club last summer. Di guy no happy wit di club as dem no do wetin dem tok say dem go don wen dem renew him contract. Anoda condition bi say, Mbappe wan make di club remove di manager wey dey dia now, Christophe Galtier wit Zinadine Zidane wey no get any work for now. Him numba 3 condition na say make di club buy Harry Kane wey dey play for Tottenham as e bi like say Mbappe go like share dressing room with di English man for Paris.

 Di Ekiti State Governor, Biodun Oyebanji don yarn say him don ready to support sports mata as him tok am during campaign. Say all di necessary tins wey suppose make sports sweet make more pipo for take enta di game for Ekiti including Women, say him administration go make am happen. Him say, di 4 mini stadiums wey dey Ado, Ikere, Ijero and Ikole naim dem go work on to make am dey up to international standard. Him tok say all di equipment wey dem need him go provide am as sports don turn to ogbonge mata for di world to develop youth quick quick. Kunle Adeyemi wey bi General Manager for Ekiti State sports council don appreciate di Governor say him like how di Governor take start so, e mean say him get beta mind to make sports make sense for di state.

 Na yesterday English Premier League resume again afta world cup break wey start for November, 2022. Di result of di games wey happen yesterday Brentford vs Tottenham: Brentford no joke o, na dia game bi di numba one game wey fess happen afta di world cup break. Brentford first give Tottenham 2-0 before Tottenham con sabi say "e bi likeEPL don start o. Bi like say we dey sleep." Na so Harry Kane score first one for Tottenham before Hojbjerg finally equalize to make am draw. Southampton vs Brighton: Southampton collect from dia own house as  Brighton drop 3 hot goals for dia lap. Southampton even dash Brighton goal. Di second goal na own goal wey make di total goal for Brighton bi 3 for di game. Leicester city vs Newcastle: Leister sef hear am for Newcastle hand as Newcastle flog dem for dia home. Na wood first nak dem 2by2 plank for neck before Almiron and Joelinton finish dem up. Crystal Palace vs Fulham: Na so Crystal Palace sef collect wotowoto for Fulham hand. Apart form

 As una know say na tradition for England say dem must play game boxing day. Dem no dey carry am play. Na di games wey go happen today bi dis. Brentford vs Tottenham. 2pm Southampton vs Brighton. 4pm Leicester city vs Newcastle. 4pm Crystal Palace vs Fulham. 4pm Everton vs Wolves. 4pm Aston Villa vs Liverpool. 6:30pm Arsenal vs Westham. 9pm

 EPL go start again today! Wia your team dey for table and wia you tink say dem go end am wen season finish for middle of 2023? Na matchweek 16 we dey enta so. Which Miracle you dey expect to see?

 We dey use dis time wish una, our readers wey dey support us everyday Merry Christmas 🎄. Dis Christmas go make beta sense for us and happy new year in advance. We hail una and we respec una support.

 Premier League Giant Manchester United don show say dem dey interested to sign Aston Villa keeper wey bi Argentina keeper for di 2022 world cup, Emiliano Martinez afta di wonderful performance wey di guy show inside di world cup wey jus finish for Qatar. Martinez win di Golden Glove Award wey dem give di best goalkeeper for di tournament as Argentina win di World Cup. No bi only Man-U dey find to sign Martinez o, Even Bundesliga giant, Bayern Munich dey find how dem way take carry di guy come dia team. Dem neva renew David De-Gea, wey bi Man-U numba 1 keeper contract, even as e bi say di contract go expire for next summer. Martinez play all di 7 games wit Argentina for di 2022 world cup and so far, him don play 15 game for Premier League dis season.  

 Dem don appoint Avram Grant as di head coach of Zambia National team. Di former Chelsea manager dey go Africa for di second time as Head coach afta e bin don coach Black Stars of Ghana between 2015-2017 wey carry Ghana reach final of AFCON 2015. Zambia don appoint Grant for deal wey go last for 2 years. Di former Chelsea and Ghana boss naim replace Aljona Asanovic wey comot for di post of Zambia head coach for September. Former Zambia International, Moses Sochone bin don dey as interim  manager but him go return go him position as assistant now wey Grant don show. "I come here becos of di challenge and I believe say wen I comot for here, I go look round and beat my chest say, na beta job I do and I make solid foundation for di future. Zambia get di potential and we don set plan on Wetin we plan to achieve" na so Grant yarn. Grant wey bi Former coach of Black starts carry dem reach final for 2015 and Dem come still reach fourth position two years afta. Grant bi don coach Chel

 Brazil football legend, Pele go spend Christmas day inside hospital as him cancer don enta anoda level.  Him medical team and family dem yarn dis gist as him dey receive treatment for di cancer wey don dey worse now still join wit kidney and heart wahala. Di 82 years old "require make dem take care of am well untop di kidney and heart wahala wey dey ground" na so Albert Einstein Hospital wey dey Sao Paulo drop di gist. Even as e bi say di cancer dey increase, di man no dey for intensive care. Pele wey some pipo dey consider as di greatest player of all time, don dey hospitalize for Sao Paulo since November 29 for wetin him medical team tok say na re-evaluation of him chemotherapy treatment wey him don dey receive since di surgery wey him do to take remove one colon tumor for September, 2021. Doctors don also diagnose Pele- wey him real name bi Edison Arantes do Nascimento- say him get respiratory infection. For di beginning of dis month, Pele daughter, Kelly Nascimento and F

 Argentina enta dia country back as many pipo line up for street to welcome dem champions afta wetin bi 'unprecedented' win for Qatar 2022. As dem land for dia country on Tuesday morning, di captain of di team, Lionel Messi naim fess come down from di plane as him carry di gold trophy for hand, as di whole team follow am enta red carpet for di airport. As dia bus comot for airport, supporters and fans wey wear dia national color of blue and white surround  dem as every bodi jus dey hail di winning team. Video show how di bus dey move small small as dem dey behind police escort wit thousands of pipo wey dey wave di Argentina flag as den dey run fire works join. E reach like 4 million pipo wey come out come see di victory parade for di capital, na so do state media Telam yarn. Dem even declare Tuesday as National holiday untop di mata.

 Everybody wey like football for dis life don see one tin or anoda wey concern dis FIFA 2022 final wey happen for Qatar dey part of di finals wey tough pass since den don dey play World cup finals. Argentina vs France France start di final game like who dem beg to con play di match as Argentina put all dia mind begin press France like pant trouser wey tailor wan put beta gator. E nor try wey mistake happen for France box as Angel Di Maria fall inside box wey hive opportunity for penalty and Messi, deliver well. Cold first catch France. E nor too they before France defense disorganize again and Di Maria, run second enta inside di same first half. Everywia quiet like say na so di game go end, some pipo go even believe say e for reach like 5-0 wey Argentina go land France for neck. Second to half start, bi like say di progress of France no show, naim dia Coach Diet Deschamps make some kain make sense subs, di tin bin dey like say na ment cos how u go comot person like Giroud for dis kain

 Di 2022 FIFA world cup don dey close small small as di last patapata game go shele dis afternoon for 4pm WAT. Yesterday, Croatia and Morocco look each oda eye for their third place match for yesterday afternoon. Croatia vs Morocco Goals for yesterday match drop very early as di two teams don drop one goal each for inside 10 mins wey dem don play for di match. Croatia first open scoring before Morocco give dem back. As dem dey go, before half time reach, Croatia drop di second one wey make di game 2-1 for Croatia favor. Na dis 2-1 Dem carry till di game finish and Morocco bin try make dem bi di first African wey go collect medal for inside world cup but Croatia no gree dem. At all at all, Morocco suppose dey proud as dem show di world say, for football mata, Africa sef no small. Africa 'opoor' dat one ma to say Africa plenty. We get level, we get weight. Highlight

 Dis year world cup final get many side to am, one of dem na say di two main men wey dey play for each team na from same club dem dey. Messi and Mbappe na key point for PSG team and two of dem go meet for world cup final on Sunday. Who you think say go carry am? Messi (for di first time?) Or Mbappe (Make e bi back to back) Make we know for comment...

 As we know say di world cup wey dey happen for Qatar don dey close up small small. Tomorrow na di second to di final game for di whole competition. Di third place game for who go carry di bronze medal for Qatar 2022 between di two teams wey dem beat for Semi final on Tuesday and Wednesday. Croatia vs Morocco Tomorrow go bi history day if Morocco win dis game between dem and Croatia tomorrow. Croatia sef go dey look for way to win as nobodi go wan leave Qatar wit empty hand. Morocco wey bin break record as first Africa team wey go reach Semi final go wan use dia last blood play di game as dem no enta final, di bronze medal don already dey dia eye. Di match go start for 4pm WAT.

 As my Naija pipo dey yarn, first to do no dey pain... Na Wetin happen for today Semi final match between Argentina and Croatia. For 2018 for group stage, Croatia flog Argentina 3-0.  Rebic, Modric and Rakitic na dem do Argentina strong tin dat year. Remember say Croatia enta final date year but dem no win as dem lose against France for final. For 2022 Argentina turn to do con reach, dem sef return 3-0 for Croatia bodi, dis one con pain pass cos dem dey look final for front like this, naim Argentina change di station. Do me I do you, vex no suppose dey inside Messi and Alvarez na dem plan di gbege untop Croatia head.

 Argentina carry Croatia do asun for semi final. E bi like say na initia gra gra Croatia bin dey show for dia previous games so as Argentina pit dem for dia level without wahala. Di game wey happen dis night wey bi di first game of di 2022 world cup semi final show how Argentina take turn Croatia to mumu with 3 hot goals. Dem no allow Croatia see any goal sore. Na di first time wey Argentina go score 3 goals for one match try out dis world cup bi dis. Messi name dey score sheet for dis one and dis na di second time wey Messi go enta world cup final. First time na for 2014 wey Germany win dem 1-0 for di final. Make we see if Dem go fit change di story dis time. Congratulations to Argentin a. Highlight

 Argentina start dis world cup ontop loss. Saudi wey bi dia first game show dem pepper. Saudi use Argentina break record as dem beat Argentina for dia first game, since dat time, Argentina don learn dia lesson and even tho Saudi don comot tey they, Argentina still dey here. Football, especially dis world cup no bi sometin wey anybodi fit predict. Argentina: Saudi break record wit dis win against Argentina as dem win 2-1. Na even Messi fess score for di game before Saudi equalize con later win. Argentina no make di same mistake for dia second game against Mexico as dem clear Mexico sharp sharp wit 2-0 for group C wey both of Dem dey. Dia next game wey bi final game for di group con bi against Poland wey dem still win 2-0. Na dat one con make Argentina qualify enta round of 16. Argentina carry 6 points for inside group C, na dem con still dey top for di group. For round of 16, Argentina meet wit Australia con still clear Australia wit 2-1 to take qualify go quarter final. Di quarter fina

 Na dis night di first semi final game inside di Qatar 2022 world cup go happen. Di game na between Croatia and Argentina. How den take start till now. Croatia: Croatia begin dis world cup wit dia first game wit Morocco for group F. Di two team play goal less draw for dia first match. Dia second game na wia dem start to dey show say dem no come dis world cup to come play as dem discipline Canada 4-1. Dia third game against Belgium na still 0-0 draw wey con make dem get 5 points for group F. As group stage finish, Croatia comot for di group for second place wit 5 points as dem finish for back of Morocco. Dia round of 16 game con bi against Japan wia both of di teams no gree as dem play 1-1 draw inside di 90mins plus extra time. Na penalty dem later use settle di mata. Na dia Croatia show Japan say dem bi oga. Quarter finals con dey hot as Croatia con meet wit Brazil, many pipo don write Croatia off say notin wey den fit do against Brazil, some Croatian fans sef go don give up but wetin

 Di last match for di Qatar 2022 quarter finals show wit plenty tins wey pipo no even expect. Ronaldo bin get hope say im team go go far for dis world cup but Morocco stop dem as dem sef con break record untop sometin wey African team neva do before (di gist dey previous post) France sef join use England wash, even as England get chance to equalize untop di penalty wey Harry Kane troway. Next game wey bi Semi final na between Morocco and France den for di oda side, Argentina and Croatia go meet too. Di highlight of di game dey here so. Morocco vs Portugal France vs England

 Wahala dey o... Wetin eva happen before don happen o.  Morocco don break di record o. For di first time since dem start to dey play world cup, African team neva smell Semi final, na for dis 'unusual' world cup, wey start for November, instead of di normal June, dis mata for happen. Morocco win Portugal 1-0  as En-Nesyri put am for Portugal bodi wotowoto yesterday to advance di country enta Semi Final, di first wey any African country go try am. As Morocco enta so, dem go dey hope make dem see chance enta Final as dia next match na against France on Wednesday. Africa happy die as dis one touch dia hearts and dem dey pray say make di cup come do continent 

 Netherlands and Argentina struggle between dia two for who go qualify enta Semi final for di world cup wey dey go on for Qatar so. Netherlands vs Argentina As we know say two of Dem na first class teams and none go wan bow for di oda person. Di game drag enta penalty as for di 90 and extra time, na 2-2 dem play. Argentina do already score dia two goals for inside 90mins Monila score for 35mins as Messi top am for 73 mins. Argentina bin don settle down say, no shaking! But as di match time reach 83 mins, Weghorst score for Netherlands, di guy still add anoda one for 90+11 mins. Na dia everywia scatter. Argentina don almost dey cry say which kain bad luck bi dis. As dem drag di mata reach extra time, none of dem see any goal before dem enta penalty to settle di mata. Las las, Argentina win with 4-3 for penalty shoot out. No bi small joy as dem bi don dey reason say, e fit no bi again afta Netherlands score second goal. Highlight

 No bi small mata for Qatar dis afternoon as Croatia use Brazil back take jump enta Semi final for inside di world cup wey dem dey play go so. Tins wey pipo no expect say go happen jus happen as dis world cup dey shock pipo like electricity. Anoda ogbonge game wey happen na di one of today between Croatia and Brazil. Croatia vs Brazil Even Brazil go don believe say e no get how e wan bi say di Semi Final, dem go enta. But di story change as Croatia push dem commot for road. Di game end for 0-0 draw afta 90 mins as nobodi gree for di oda person to score but as dem enta extra time, Neymar show up for 105+1 minute wit di first goal of di game. Everywia scatter as Brazil don reason say, finally, e don bi! As match enta 117 mins naim Petkovic equalize for Croatia con make am 1-1. na di score line dem drag sotey, di two teams land for penalty. Na inside di penalty mata Croatia con show Brazil say dem senior dem for dis one. Croatia flog brazil 4-2 inside penalty shootout. Brazil don catapult

 Dis evening, quarter finals go start as Croatia and Brazil go open floor for 4pm Nigerian time. Croatia wey enta final for last World cup go dey try rock am wit Brazil wey bi di highest World cup winners for who go enta Semi final for among two of dem. Even as e bi say na Brazil everybodi tink say go win am, for dis 2022 World Cup, notin dey 100 certain. Netherlands vs Argentina. Di two teams no go wan gree for one anoda, Argentina go wan win by all means as e fut bi last World Cup for Messi bi dis and e go wan do anytin wey im fit do to win am. Dis one go happen for Night at exactly 8pm Naija time. Prediction don dey go for various platforms as we dey tok so. 

Goncalo Ramos enta im first world cup game and di guy perform wetin bi like magic. Sometin wey suppose hard, di guy make am soft as e score 3 goals for Portugal for dia round of 16 game against Switzerland on tuesday. Di game bi im first world cip appearance and di guy deliver more dan expectation. Na Ramos replace Christiano Ronaldo for di game and im score hat trick to put di country forward go quater final as dem crush Switzerland 6-1 for di game wey make dem register dia place for di quater final hame against morroco on saturday. Dem call am "pistolero" bcos of di way wey e take celebrate. Ramos wey don dey enta pipo eye now play im first country match wit Portugal wen dem play friendly wit Nigeria before Qatar 2022 world cup start. For di friendy match wey Portugal win 4-0, Ramos provide assist even as e bi say dem carry am enta as subsitute. As tins bi now e bi like say di guy don dey prepare himself as replacement for C.Ronaldo. Afta dem announce am as man